- الفنان سهيل البيضاوي مرحبا بك.
- أهلا وسهلا.
- من هو الفنان سهيل البيضاوي؟
- سهيل البيضاوي هو فنان ديال العيطة من مواليد سباتة في كازا. كنبغي العيطة حتى النخاع وكنحب الفنانة ديال العيطة وكل ما كيتعلق بها.
- كيفاش كانت البدايات ديالك؟
- كنت من المؤسسين لفن العيطة والشعبي في حي سباتة. في ديك الوقت كانو المشاهب وناس الغيوان ومجموعات أخرى هي لي باينة. وحيث عشقت العيطة، اتجهت ليها وكنت دائما باغي تكون عندها المكانة لي كتستحق.
- عاود لينا كيفاش بديتي الغناء.
- بديت بتجويد القرآن وكنت ممتاز فيه أيام المدرسة الإبتدائية. عشقت كوكب الشرق أم كلثوم وفريد الأطرش ومحمد عبد الوهاب ونجاة الصغيرة ولكن الجنون ديالي بغاو ليا العيطة خصوصا الحصباوية والمرساوية حيث كنت كنتقنهم وكنلقا راسي فيهم أكثر.
بالإضافة للعيطة والشرقي، شنو اللون الفني المغربي لي تأثرتي بيه؟
كنت كنسمع للأغنية المغربية الأصيلة وتأثرت بمجموعة من الفنانين المغاربة كمحمد الحياني، نعيمة سميح، عبد الوهاب الدكالي، سعاد محمد، الغرباوي، الحسين السلاوي إبراهيم العلمي والقائمة طويلة.
- كيفاش حتى عشقتي العيطة؟
- العيطة كانت جزء من الحياة ديالنا في الدار؛ الوالدة كانت مولوعة بالعيطة وكنتذكر كيفاش كانت هي والجارات كينقيو الزرع و كيستمتعو ببوشعيب البيضاوي عبر جهاز الراديو، وكذالك بفاطنة بين الحسين ومجموعة من عمالقة العيطة في ذالك الوقت.
- حكي لينا كيفاش حتى مشيتي لهولندا.
-كنت موظف في لاراد (ليديك حاليا) وبحكم النشاط الفني ديالي، جاني عرض لإحياء حفلة ببلجيكا، وفعلا قبلت العرض وانتقلت بعدها لهولاندا باش نحيي حفلة. شاءت الأقدار باش نتلقا الزوجة ديالي السابقة ومن بعد ما تزوجنا استقريت بهولاندا.
كيف ترى وضع فن العيطة اليوم؟
رغم أنها لن تنقرض أبدا، العيطة في خطر، اللهم إذا اهتمينا بيها أكثر وشجعنا الشباب والباحثين باش يهتموا بها ويحبوها. فيما يخص الوضع ديال فناني العيطة، أظن أن هناك قسمين: فنانين واخدين العيطة على أصولها وغاديين بيها مزيان، وفنانين لي كيعزلو فقط ما هو سهل في الفن وبالتالي كيساهموا في ضياع أجزاء مهمة منها. كمثال، نتوما العلامة هي عتبة من العتوب ديال عيطة دامي، ولكن للأسف بعض الفنانين يغنون فقط الجزء السهل منها.
- شنو الرأي ديالك في الإستعانة المفرطة بالآلات الموسيقية للتغطية على ضعف صوت المؤدي؟
- إذا كان الصوت كيضرب في القلب، تقدر تحيد الآلة كاع، والعكس صحيح. لوكان ماشي صوت فاطنة ماكنتش غادي نكون كنغني العيطة اليوم. صوتها دخل لقلبي ديريكت، ولو كنت سمعت أصوات ماشي في المستوى، أكيد ماكنتش غادي نحب العيطة.
- حكي لينا على علاقتك بالفنانين في البدايات ديالك.
- جاورت جل الكوامانحية والفنانين المعروفين كعبد العزيز الستاتي، سعيد ولدالحوات، لحسن المسكيني وآخرون. كنت عزيز عليهم حيث كانئدي بصوت عالي. ماكنتش كنقدر نخدم مع الجميع نظرا لكثرة الطلب. في سباتة والنواحي ما ماكانوش أصوات كثيرة باستثناء محمد سيف وأصوات قليلة أخرى وكنت أول فنان حفظ العيوط وغنى العيطة وكذلك الشعبي.
- شنو علاقتك بالمرحومة فاطنة بنت الحسين؟
- كنت ومزال مولوع بيها وخدمنا مجموعين في بعض الحفلات في صوت النسيم وفي آسفي وأماكن أخرى، هي بالمجموعة ديالها وانا بمجموعتي. كانت كتقول "واتفرقو عليا مالكم تابعيتي.. غي لي بغا يغني يغني فاطنة" من باب الدعابة طبعا.
- واش التواشي والبراول والسواكن مهددة بالإنقراض في نظرك؟
- التواشي والبراول والشيظمي والزعري عمرهم ماينقرضو ، واخا السواكن قليل لي مازال كيغنيهم. للأسف بعض الفنانا لي كانوا بارعين في السواكن بداو كيتخلاو عيلهم. وبالمناسبة كنحيي سعيد ولد الحوات لي مازال كيئدي السواكن ببراعة.
- شنو رأيك في إدخال آلات عصرية وجديدة على العيطة؟
- إذا كانت فيها شي منفعة للعيطة وتقدر تزيد بيها للقدام علاش لاّ، وكيبقى الصوت هم أهم شيئ في الغناء بشكل عام وفي أداء العيوط بشكل خاص.
- شنو رأيك في بعض الأيادي لي هازة مقص الرقابة وباغا تفرض توجه معين على فن العيطة؟
- أنا مع الحرية والمسؤولية. العيطة كانت دائما حرة ومايمكنش نغيرو التاريخ ونزوروا الواقع. العيطة والتاريخ بجوج كينزلوا من نبع واحد.
- الفنان سهيل البيضاوي يؤدي العيطة ببراعة ناذرة وكذلك النمط الشرقي الكلاسيكي بإتقان. ياكما غادي تقلب على العيطة وتحرمنا من الأداء الممتاز جدا ديالك ليها؟
- ماعنديش الفرق بين كبة الخيل والحب كُلو؛ بجوج كيطربوني وحتى الحركات لي كندير بيدي بحال بحال سواء غنيت العيطة أو أديت أم كلثوم.
- واش تقدر تخلى على العيطة الحقيقية بحكم توجهات الجمهور وإكراهات السوق والمهجر؟ - العيطة كتجري في دمي مستحيل نتخلى عليها. بالعكس كنحاول نحببها أكثر للجمهو رغم إكراهات الواقع.
- العيطة كتجري في دمي مستحيل نتخلى عليها. بالعكس كنحاول نحببها أكثر للجمهو رغم إكراهات الواقع.
- تكلم لينا على الجديد ديالك.
- كاين ألبوم جديد قريب يخرج وكاين تسجيل جديد في الصيف الجاي. من الطريف أنني كنت من الناس الأولين لي غناو حاجتي في كريني في الثمانينيات وعاد غادي نسجلها.
- شنو رأيك في بعض الفنانة الجداد لي تشهروا بالعيطة مؤخرا؟
- ماعندي حتى شي تعليق وكيعجبني لي يدير شي حاجة ويعطيها حقها.
- الفنان سهيل البيضاوي، كلمة أخيرة للمعجبين ولعشاق العيطة.
- تحية للمعجبين دياولي، للفنانة ولجميع الناس لي كيحبو العيطة. كنحبكم كاملين واخا نكون ماكنعرفكومش ولكن حب العيطة كيجمعنا.
- الأستاذ سهيل البيضاوي، شكرا جزيلا على هاد الحوار الشيق، على المعلومات لي قسمتي معانا وعلى الروح الجميلة ديالك. إلى اللقاء.
شكرا.
أجرى الحوار: حسن أبناو
28 مارس، 2017